Rerenga Kōrero Hāngū
Kei roto i te rerenga kōrero ngoi, ka whāiti te titiro ki te kaimahi (arā te tangata, te mea rānei e mahi ana). Heoi anō, ka āta tirohia te kaiwhiwhi o te kupu mahi e ngā rerenga kōrero hāngū (te mea i pāngia e te mahi). Ko te rerekētanga o te rerenga kōrero hāngū ka āta tirohia te tangata, te mea rānei i pāngia e te kupu mahi (te kaiwhiwhi).
He tauira, e whai ake nei, o te hanganga o te rerenga kōrero hāngū. Me mōhio he ōrite ngā tohu wā o ngā rerenga kōrero hāngū me ngā rerenga kōrero ngoi.
Tohu wa + kupu mahi (kua hāngū) + kaiwhiwhi + e + kaimahi
Kua + hanga(ia) + te marae + e + ngā tohunga
Kua hangaia te marae e ngā tohunga.
The marae has been built by the experts.
Whakaritea tēnei ki te āhua ngoi:
Kua hanga ngā tohunga i te marae.
The experts have built the marae.
Tirohia ngā rereketanga:
- Kei te whai 'whiore', aro matau hāngū rānei te kupu mahi;
- Kua whakakorengia te tohu aronga 'i';
- Kei mua te kupu 'e' i te kaimahi.
He tāpirihanga motuhake, arā he whiore ka tāpiritia ki te mutunga o te kupu mahi i roto i ngā rerenga kōrero hāngū. Kei tēnā kupu mahi tōna whiore, kei tēnā tōna. Anei ētahi tauira e whai ake nei:
| Hāngū | Reo Pākehā | Tauira |
|---|---|---|
| kōrero(tia) | speak / talk | I korerotia ngā kupu e te tama. The words were spoken by the boy. |
| tango(hia) | remove / take off | Kua tangohia ōku hū. My shoes have been removed. |
| mahi(a) | work | Kua mahia te mahi e au. The work has been finished by me. |
| hanga(ia) | build | Kua hangaia te marae e ngā tohunga. The marae has been built by the experts. |
| whai (whāia) | chase, pursue | I whāia au e te pūru. I was chased by the bull. |
He kupu mahi anō, kāore he hāngū.
He maha ake ngā rerenga kōrero hāngū o te reo Māori i ō te reo Pākehā. Ka kitea ki ngā tauira kei runga ake he āhua rerekē ki te taringa ngā whakapākehātanga, nā reira i ētahi wā he pai ake te whakamāori i ngā rerenga ngoi o te reo Pākehā ki te hāngū.
